【Emily】搭機場快線去亞博 冬日優惠47蚊

【明報專訊】亞博館噚日（7日）宣布，為配合多項大型活動，下周一（11日）起至明年2月18日將再同港鐵合作，推出機場快線47元嘅限定優惠。乘客由香港站或九龍站乘坐機場快線至博覽館站，喺入閘前要去相關車站嘅特設櫃台，憑活動證明同八達通換購車票；而喺青衣站坐港鐵到博覽館站，則需用同一張八達通即日往返市區與博覽館站，並喺亞博館逗留逾一小時或以上，多收嘅車費會喺回程出閘時自動退回八達通。至於3至11歲小童就可喺優惠期內免費乘搭機場快線。

根據亞博館資料，優惠期內最少有15項大型活動舉行，包括香港國際汽車博覽、首屆大灣區香港學校教育展及公益金55周年百萬行等。另外本港男團MIRROR，台灣歌手安溥、羅志祥，以及日本歌手中島美嘉，明年都會先後喺亞博館舉行演唱會。