【Emily】陳健波腰痛 靠游水好番

【明報專訊】保險界立法會議員陳健波不時拍短片教人養生健康之道，今次仲搵埋特別嘉賓——前食物及衛生局長、骨科專科醫生高永文，講講坐骨神經痛治療。原來波哥近期都有坐骨神經痛症，但佢話自己靠游水醫好，唔使睇醫生。

請高永文講解椎間盤突出

波哥話，多年前搭飛機拎行李時扭傷腰，當時都有睇醫生，但最後靠游水好番。不過，佢話今年唔知點解腰痛復發，做埋磁力共振檢查，最後都係用番舊方法，游水游足兩個月、每日游45分鐘先至好番。

波哥於是請教高永文有關椎間盤突出嘅問題，問可唔可以透過游水紓緩。高醫生好認真，拎埋腰椎模型講解椎間盆突出嘅成因，佢話游水對身體整體同脊椎都好好，但應該唔可以淨係靠游水，令突出嘅椎間盤縮返原位。高醫生話，游水、腰間活動、物理治療等方法都可以強化腰間肌肉，或有助減輕痛症；有啲人會試針灸、推拿等，但如果各種方法都無效，就要用藥物治療喇。