【Emily】立會午間音樂會復辦 聽已長大嘅「小鬼隊」演奏

【明報專訊】因疫情停辦4年嘅立法會午間音樂會噚日復辦，立法會主席梁君彥喺facebook話，佢同幾個議員同職員都趁午飯時間去大堂，觀賞香港口琴協會聖雅各少年口琴樂團嘅演出。佢話幾年前已邀請呢個樂團表演，由於當時樂團係成立之初，團員多數係小學生，所以被戲稱為「小鬼隊」，?家部分團員已經「長大成人」，見到佢哋仍兌現當年承諾，覺得好感動。

「小鬼隊」今次演奏咗多首中外經典樂曲，例如有西班牙風情嘅Granada、香港名曲《獅子山下》、廣東名曲《步步高》同《聖誕組曲》。梁君彥希望「小鬼隊」保持呢團火，繼續用音樂「說好香港故事」。

選委界議員陳沛良亦喺facebook話，觀賞完表演之後有同成員交流，了解佢哋嘅訓練過程，祝願佢哋音樂道路上勇攀高峰，同埋預祝聖誕快樂。