【Emily】體驗殘疾者出遊 議員批無障設施

【明報專訊】香港復康會噚日舉辦「無障行者2023-海陸空親子遊」，體驗殘疾人士出行情境。立法會議員狄志遠、江玉歡同復康會會長郭鍵勳組成一隊，要推住輪椅搭車搭船，其間要克服唔少障礙。狄志遠話，天星小輪有兩至4個輪椅座位，噚日其中一個座位安全帶扣壞咗，幸好員工即刻幫手，仲同公司反映情况。

江玉歡活動後話，香港唔少無障礙設施其實並非完全友善，例如路面凹凸不平、往乘公共交通嘅電梯數量不足，亦未有專責部門監察無障礙設施嘅數量及維修狀態，導致有設施長年待修。佢稱香港嘅無障礙設施並非為「以老護老」或獨個出外嘅殘疾者而設，希望政府走前幾步，令無障礙真正得以落實及改善。

狄志遠亦話，輪椅出行喺本地未盡完善，政府及商界可與復康團體多啲溝通，了解使用者需要，改善設計。今次活動有逾400名企業、學生、病人組織等人士參加，佢哋分成近60隊，要用輪椅體驗乘坐天星小輪及摩天輪，要模擬殘疾者日常生活情境，如要搵輪椅樓梯機、傷殘人士洗手間等，活動為香港復康會籌得近100萬元善款。