【Emily】智能公廁困跑手 議員批無乜智能

【明報專訊】本月上旬舉行嘅香港越野跑挑戰賽，有參賽跑手話自己一度被困沙頭角荔枝窩智能公廁10分鐘，無法開門，最後唯有大力拍門求救，由外面嘅人開門。副環境及生態局長黃淑嫻噚日喺立法會一個委員會上證實確有其事，解釋話公廁上月先啟用，涉「初始問題」，現已解決。

環境局：涉初始問題已解決

實政圓桌田北辰會上質疑，點解個智能公廁嘅手動開門同緊急開門掣都失效，又冇緊急聯絡方法，「設計（智能公廁）嘅人冇乜智能」。黃淑嫻話，個廁所設有電子鎖同手動鎖，而電子鎖係無法開到手動鎖嘅，所以如果用咗手動上鎖，揮手都開唔到門；佢又話政府人員已檢查緊急開門掣，無發現問題。

黃淑嫻話現已貼咗使用指示，令使用者更清晰，指示上有聯絡方法。佢強調，市民可透過熱線同電郵投訴，仲提到當局曾就荔枝窩智能公廁做問卷調查，派咗330份問卷，話使用者大致滿意。田北辰就喺facebook繼續回應，話相信已解決咗問題，又提議要定時巡視公廁「黑點」地區，若承辦商未達服務標準就要採取罰款措施，同時縮短合約時間。