【Emily】聖誕元旦 港深高鐵日增22班 平安夜除夕 港鐵通宵開

【明報專訊】聖誕新年假期臨近，高鐵喺本周四（21日）到下周二（26日），同埋下周五（29日）至元旦期間，每日增加11對（即22班）往來香港及深圳的高鐵列車班次，增加後每日列車班次超過100對，有關車飛噚日已開始發售。港鐵話，新增班次包括10對往來西九龍站同福田站嘅列車，同1對往來深圳北嘅列車，都適用於「靈活行」即日變更車次安排，可供乘客選擇改乘。

港鐵又話，為增添聖誕氣氛，西九龍站增設彼得兔聖誕主題攝影區，畀乘客打卡留念。西九龍站喺假期旅遊高峰期間會加強車站指示同廣播，並會加強人手協助乘客。

本地服務方面，平安夜同除夕呢兩晚，港鐵其他路線會提供通宵服務，當中包括東鐵線金鐘至上水段，但不包括東鐵線往來羅湖同落馬洲段、機場快線同迪士尼線；7條輕鐵線（505、507、610、614P、615P、751、706）同樣會通宵行駛，另有3條港鐵巴士線（506、K51、K54）延長服務時間。