【Emily】沙頭角交通懶人包 教你搭車又搭船

【明報專訊】沙頭角開放計劃元旦開始，市民可以申請入去參觀，保安局噚日喺社交平台拍片整理交通「懶人包」，教市民搭巴士、小巴去沙頭角，但就唔可以自己揸車入去。到咗沙頭角之後，仲可以乘搭街渡循環線去鴨洲等外島。

沙頭角開放計劃首階段每日容許最多1000個旅客經網上申請禁區許可證，包括700個旅行團同300個個人旅客，喺指定日期朝七晚九進入除中英街以外嘅沙頭角遊覽。保安局前日喺社交平台提醒市民入沙頭角須申請禁區許可證，仲拍片示範喺警務處新推出嘅網上平台自行申請。

而噚日嘅「懶人包」就話，市民可以選擇從港鐵上水站或粉嶺站，乘搭78K現有恆常班次或78S新增特快巴士路線去沙頭角；上水站同時有55K小巴可以選擇。從九龍東出發嘅市民可以到港鐵藍田站乘搭277A特別巴士路線。去到檢查站，記得要出示紙本或電子禁區證。而從沙頭角碼頭開出嘅街渡循環線將增設每日3班，每日上午10時、中午12時、下午3時從沙頭角碼頭開往荔枝窩、吉澳及鴨洲。