【Emily】郵政聖誕老人 代筆回函40載 「近年小孩願望較多盼家人健康」

【明報專訊】每年聖誕節，全世界收到最多聖誕卡嘅可能係「聖誕老人」，單係香港郵政，就收到約6000封寄畀聖誕老人嘅信和聖誕卡。為回應每份心意，過去40年，香港郵政都會安排人員以聖誕老人身分逐一親筆回信，送上節日祝福，有郵務主任話，過去小朋友想收到嘅聖誕禮物離不開玩具同電子產品，近年較多願望係希望家人身體健康同世界和平，估計與新冠疫情有關。

郵務主任劉嘉紹以聖誕老人身分回信逾10年，佢話回信費時又費心，但為咗令寄件人適時收到回覆，郵政人員可能要每日處理數百封回信，不過佢認為係開心事，每年都期待聖誕節來臨。

年收6000封 「趕工」為適時回覆

去年開始執筆回信嘅郵務員郭頌羚，今年再次為聖誕老人代筆。佢話除咗小朋友之外，原來仲有唔少家長來信，同子女一齊製作聖誕卡或畫畫寄畀聖誕老人，而佢亦會畫畫回覆。郭頌羚話曾收到小女孩來信，話知道媽媽懷孕，自己快將成為家姐，感到好興奮，郭話可以代聖誕老人回信，特別係同小朋友交流，非常有趣。

其實不論大小朋友，只要喺信封寫上「聖誕老人收」同回郵地址，支付足夠郵費（重量不超過30克，本地郵費2.2元），就可以收到郵政聖誕老人嘅親筆回信。