【Emily】邵家輝倡多講「唔該、歡迎」畀旅客好感 話聖誕零售麻麻 盼「笑多啲」改善服務

【明報專訊】4日聖誕長假結束，立法會批發及零售界議員邵家輝噚日話，香港今年聖誕零售表現麻麻，建議除咗政府要多搞活動、業界多做推廣，亦要加強服務文化。佢話香港人力不足導致服務態度唔好，出去食嘢成日「趕鴨仔」，希望業界「畀多啲笑容，講多幾句『唔該』、『多謝』、『歡迎』」，令旅客返去自己地方都會幫香港宣傳。

邵家輝噚日喺港台節目話，政府推出好多活動例如夜繽紛、廟街夜市等，業界亦推出優惠吸客，有連鎖化妝店因而錄得雙位數生意增幅，但市民經歷幾年新冠疫情後，紛紛趁長假期外遊或北上消費，相反香港承載力唔夠，酒店、機票價格未落番去疫前水平，吸引唔到海外旅客。佢透露自己本來打算聖誕外遊，但響應特首呼籲留港消費。

佢話近年出街食飯買嘢見到「笑容少咗」，希望業界改善服務態度，相信政府輸入外勞後會改善，又建議入境口岸職員要對遊客態度再友好啲，令旅客入境「有好感覺」。

建議口岸職員再友好啲

Emily睇番舊報道，原來入境處喺疫情前每年都會舉行禮貌運動，旅客可以投票畀表現值得嘉許嘅入境管制人員，最高票嘅會獲旅發局委任做「香港禮貌大使」。