【Emily】迪士尼6萬件玩具捐25非牟利機構

【明報專訊】唔知大家有冇收到心水嘅聖誕禮物？香港迪士尼樂園話，今年再舉辦名為「分享禮物．分享愛」嘅聖誕玩具捐贈活動，共捐出逾6萬件玩具畀逾25間本地非牟利機構，包括香港兒童醫院、香港小童群益會及香港基督教女青年會等，總值相等於約1300萬元，係園方自開幕以來最大規模嘅玩具捐贈項目。行政總裁莫偉庭（Michael Moriarty）話，聖誕節唔止係慶祝節日，亦是內省同感恩嘅時候，期望將歡樂與所有人分享。

迪士尼義工隊亦為多間非牟利機構同學校舉辦聖誕派對，包括為逾100名香港兒童醫院病童舉辦《魔雪奇緣》派對，有攤位遊戲同製作手工等，著上聖誕老人服飾嘅米奇老鼠現身與病童跳舞互動。華特迪士尼公司另向香港兒童醫院慈善基金捐贈50萬元，用作提升醫院病人服務與體驗，包括為病童及其家人提供音樂與藝術活動。