【Emily】上機體驗前線 國泰CEO遇航班取消

【明報專訊】聖誕假期係旅客外遊嘅高峰，有航空討論區引述「國泰航空內部消息」，話國泰行政總裁林紹波（Ronald）原定前日（27號）飛上海，因航班取消要轉搭另一班機。據Emily了解，Ronald班機的確因為機組人手不足，搞到最後要改上另一班機，但當時佢係上機體驗前線工作，而唔係做乘客飛上海。

消息人士解釋，Ronald原本上嘅嗰班機，因為請病假嘅機組人員太多，導致航班最終取消，佢要改上另一班。不過，消息話Ronald當時身分唔係搭客，而係以體驗前線身分，落場幫機組同事手。

據Emily所知，國泰管理層定時定候都會輪流參加類似嘅前線體驗日，走上第一線，Ronald當時因為咁而要上機，聽聞佢無變身空少，都係著番西裝，雖然未至於要擔擔抬抬，但都有幫下同事執頭執尾。

國泰亦發聲明，話呢個月流感季節期間，機師因病缺勤較預期多，但整體營運保持正常。國泰話，為應對呢個情况同確保整體航班服務正常，決定主動取消個別航班，月中以嚟少於總數1%嘅客運航班被取消。