【Emily】接生元旦B護士：盼成長唔使爭第一

【明報專訊】瑪麗醫院早前迎來公立醫院今年首個「元旦BB」，仲短短半個鐘內迎來另一BB。該院facebook噚日發文分享，除夕夜出現緊急剖腹產子個案，半數當值護士助產士被派到手術室，得番當日身兼產房主管嘅產科副顧問護師周雪儀、註冊護士助產士Stephanie同另外兩個助產士負責照顧其他孕婦。由於人手緊絀，周雪儀暗自祈求寶寶「乖乖哋」，唔好同時出世。

結果，周雪儀同Stephanie率先為一名「首胎媽媽」接生，準爸爸非常肉緊，一直大叫加油又捉實太太隻手，結果跨越零時，呢對新手父母迎來公院今年首個元旦BB。

周雪儀之後緊接要到隔離產房為印度籍產婦接生，最終BB喺零時36分順利出世，分娩過程用咗3個幾鐘，無用任何藥物，醫護不禁大讚呢位媽媽犀利。

Stephanie去年加入助產士行列，周雪儀就服務產房15年，但兩人都係首次接生元旦BB，佢哋形容接生當刻專注工作，無留意時間。Stephanie話雖然元旦BB一出世就「攞第一」，但希望所有BB喺成長路上唔使時刻競爭，健康快樂長大就夠。