【Emily】曾俊華去東莞 話唔係玩樂係考察

【明報專訊】近一年好多人北上消費玩樂，前財政司長曾俊華話，近日北上去東莞，但唔係去吃喝玩樂，而係考察一下，有冇乜嘢創新科技嘅投資項目。曾俊華話，佢同太太唔係購物狂，亦唔特別熱中瓹窿瓹罅搵好嘢食，所以基本上喺香港嘅店舖已經滿足到佢哋嘅需要，但如果有機會嘅話，都會想北上行番轉，睇驗一下北上消費嘅情况。

曾俊華話，兩地物價有一定差距，港人北上消費係好自然嘅現象，呢個情况唔係今日先開始，而香港租金貴、人工高，同人鬥平無得鬥，故應該走一啲比較獨特，較高增值、較高檔嘅路線去吸引人。

佢話，覺得唔少內地甚至外國朋友嚟到香港，其實係想體驗一下港人嘅生活模式；又話了解最近好多遊客，入去大酒店唔係去飲下午茶，而係走去用靚廁所，佢哋會行吓八仙嶺，去吓長洲食海鮮。佢又認為香港商戶唔好停留喺悲情狀態，否則無助走出困境，而一定要適應呢個新常態，然後尋找適合香港嘅獨特新出路。