【Emily】樓宇復修資源中心 立體模擬甩石屎

【明報專訊】本港去年發生多宗舊樓外牆混凝土或批盪剝落事故，市建局喺土瓜灣設立首間樓宇復修資源中心，以互動及有趣嘅方式令市民明白樓宇復修嘅重要。中心內其中一個亮點係四維多媒體大型屏幕，以立體影像方式模擬一幢樓宇日久失修導致石屎剝落嘅場景，市建局話場景「足以讓參觀者心生警惕」。

場內設有機械人「維修寶」沿途介紹各展區內容，包括樓宇復修、申請資助計劃等資訊。業主亦可利用中心嘅視像諮詢同視像申請服務，辦理各項樓宇復修資助計劃嘅申請手續。住喺佐敦一幢約50年樓齡舊樓嘅陳太，係大廈嘅業主立案法團主席，佢話大維修費用好貴，若手頭緊嘅長者業主可以得到政府資助「係一支好好嘅強心針」，推動業主維修。

資源中心去年7月正式開放畀公眾參觀，截至12月共有約6000人次參觀，並舉辦逾40個導賞團，市民亦可於辦公時間免費入場參觀，唔使預約。