【Emily】顏汶羽倡圖書館假日開夜啲

【明報專訊】民建聯議員顏汶羽日前北上深圳，到訪當地市委組織部打造、全天候開放嘅「百姓書房」，仲話令佢諗起香港多年前都有一間通宵營業嘅書店，受到唔少人追捧，雖然之後種種原因令書店停止通宵營業，但反映到港人對閱讀同自習空間有需求。佢希望政府可以研究吓，畀康文署喺星期日同公眾假期，將圖書館、自修室開放到晚上。

顏汶羽喺社交平台分享，深圳嘅百姓書房以「二十四小時為你亮着的一盞燈」理念，向市民提供一個免費、舒適嘅閱讀環境同自習空間。書房樓高4層，藏書逾兩萬冊，第一層係公共閱讀區、階梯閱讀區同兒童繪本區，全天候開放；其餘三層有自修室、藝術展廳同咖啡店，分別開放至晚上9點半同10點。

顏汶羽建議政府可以畀康文署延長開放時間，未必要學百姓書房24小時開放，但起碼周日同公眾假期可以將圖書館、自修室開放到晚上，畀雙職家庭帶子女到圖書館享受閱讀樂趣。