【Emily】G19唔撐離境稅 倡徵加密幣印花稅

【明報專訊】近日財政司長陳茂波就《財政預算案》聽取各政黨意見，佢早前提出或檢討公共服務收費，噚日到一眾以功能界別、商界立法會議員為主組成嘅政團「G19」見財爺，會後佢哋話，建議直接影響基層民生嘅政府收費盡量維持不變，但同意要研究以能者多付原則檢討部分收費，包括增加私家車首次登記稅、調高公屋富戶租金、提高泊車咪表費等，另建議開徵加密貨幣印花稅、豪宅印花稅、豪華遊艇稅。對於自由黨前日提議嘅港人「海陸空離境稅」，G19表明唔支持。

每年預算案都會有唔少「派糖」措施，G19成員之一、選委界議員陳沛良認為，按港府嘅財政狀况，今年好難再好似過去幾年咁大幅「派糖」，但佢希望政府可以從部分扣稅措施着手，例如提高自願醫保、供養父母等長輩嘅免稅額，並為香港永久居民提供上限20萬元嘅首次置業印花稅扣除等。