【Emily】大年初八搞春茗 記協：盼同行互問好

【明報專訊】香港記者協會連續幾年搞唔成籌款晚宴，不過農曆新年都係歡聚一堂嘅時間，繼舊年6月舉辦55周年聚餐，記協今年會喺下個月大年初八（2月17日）晚喺銅鑼灣搞新春春茗。記協喺宣傳單張中話，希望可以同傳媒行家一齊圍爐，互相問好、互相關心。Emily留意到，舊年聚餐開價1088元、早鳥880元，今年春茗就減價，繼續好意頭嘅688元。

記協主席陳朗昇同Emily講，過去晚宴多少有籌款性質，今次執委會主要想聯誼，所以希望價格相宜啲，同埋呢幾日新聞界都有啲不愉快事件，希望可一齊食餐飯咁話。阿昇話，上次聚餐反應唔錯、好多人話嚟唔到，近期社會氣氛無咁緊張，都希望即使搞唔成籌款晚宴都小規模搞吓飯敘。