【Emily】協恩學生港鐵實習 怕醜女拾自信

【明報專訊】直資女校協恩中學上周安排4名中四生去港鐵做實習生4日，體驗喺前線客運服務、企業傳訊、人力資源等港鐵部門工作。港鐵公司總經理-人力資源蕭慧雯話，盼活動豐富學生閱歷，幫助思考未來就業方向。

有份參加活動嘅梁恩喬於港鐵西九龍站體驗客戶服務工作，其間有唔識英語嘅德國旅客問路，佢當時從旁學習，指有同事臨場以網上翻譯工具同對方溝通。佢自言性格較怕醜，透過今次活動發現自己喺訪客前可以對答自如，「自己有自信心，原來我有能力同人溝通」。另一參加者謝愷桐話，有機會睇到安裝月台幕門及測試，有機會進入路軌觀察，形容係難忘體驗。

校方為中四生安排各行實習

協恩中學助理校長何冠霖話，學校每年設個人成長培訓計劃，當中安排中四生參加職場體驗計劃，去唔同地方包括醫院、銀行、酒店，話中四生係時候思考生涯規劃同選科，所以鼓勵佢哋去企業實習。

政府正「搶人才」，蕭慧雯話港鐵有1.7萬名員工，其中1.2萬個係「前線工種」，並有較多空缺，例如站務、列車同物業管理崗位，港鐵歡迎年輕人加入，舉例設學徒計劃、見習管理人員計劃等；又話港鐵有本地同其他地方嘅業務，員工可透過內部調配去唔同地方和崗位工作，形容工作都幾吸引。