【Emily】現身院慶 沈祖堯笑稱「唔好問我嘢」

【明報專訊】中大醫學院原定舊年舉辦40周年院慶晚宴，點知遇上10號風球要延期，前晚（13日）終於順利舉行，約2000人聚首一堂慶祝。上周宣布請辭、身陷校政風波嘅中大校長段崇智亦現身晚宴，笑容滿臉地四圍同嘉賓合照寒暄。中大前校長、新加坡南洋理工大學醫學院院長沈祖堯亦返港參加，見到Emily一眾行家上前時就笑笑口話：「今晚唔好問我嘢呀。」

中大醫學院多名前院長赴會，包括李國章、霍泰輝、鍾尚志。本月底卸任醫學院院長嘅陳家亮致辭時話，特別感謝母校對佢嘅信任，畀佢有機會為醫學院鞠躬盡瘁，喺呢個崗位度過人生黃金十年，又感謝無情歲月對佢手下留情，令佢保持赤子之心。陳家亮亦深信下任院長趙偉仁能夠帶領醫學院邁向下一個高峰。