【Emily】民記倡發展「體育旅遊」 吸引旅客行山

【明報專訊】近年香港郊外風景對唔少內地客有吸引力，民建聯噚日召開促進旅遊經濟記者會，倡議政府加強吸引各地旅客來港，身兼該黨民政及文體事務發言人嘅立法會議員鄭泳舜，認為要開拓具香港特色嘅旅遊新產品，令遊客有深度化、多元化嘅體驗，建議政府發展「體育旅遊」，包括吸引旅客來港行山、跑山，體驗劍擊運動等。

民建聯喺新聞稿提出19項建議，如揀選境外重點城市KOL來港體驗，或邀請海外電視台來港拍攝旅遊節目、電視劇取景，以吸引境外旅客。立法會新界北議員劉國勳建議，擴大自由行城市範圍，恢復一簽多行，盡快增加24小時通關口岸，並適當延長鐵路服務時間。劉又建議放寬訪港旅客免稅額，由5000元增至3萬元，吸引佢哋消費。

其實內地流行嘅社交平台小紅書不時推介本港「打卡」熱點，當中包括行山攻略，如網上有攻略教人到石澳行山。鄭泳舜話，介紹遊客來港行山、跑山，去唔同博物館，都係唔錯嘅體驗。