【Emily】「對內推廣」 政府出新logo門常開

【明報專訊】政府噚日預告，政府新聞處今日會公布政府有個全新宣傳標誌，即惹來疑問，政府係咪喺龍年「屠龍」， 棄用沿用多年嘅「飛龍」標誌？有政府中人就同Emily講，「飛龍」尚在，「飛龍」主要功能係對海外宣傳，而新logo主要係對內推廣，設計係政府總部「門常開」，當民間項目及節目獲政府支持嘅話，就可以展示「門常開」以資證明。

「門常開」其實已曝光，日前文體旅局長楊潤雄出席球星美斯來港表演賽記者會時，已拎過新標誌出嚟，只係大家唔為意。政府中人話，將來獲政府支持嘅活動，會展示「門常開」， 一方面話畀人知政府有參與，另方面係展示對民間機構嘅肯定，因為市民見到呢個標誌活動，知道係獲政府支持，應該可安心參與。