【Emily】陳繁昌：沙特無槍「安全過美國」 任沙特校長掛住中菜 唔慣「雞肉叉燒」

【明報專訊】科大前校長陳繁昌（圖）2018年去咗沙特阿拉伯，做阿卜杜拉國王科技大學校長至今。佢接受美商會刊物訪問時介紹當地，話沙特係非常安全嘅國家，「客觀上安全過美國」，「除咗警察同軍人外，無人有槍」。

有香港官員曾話可以鼓勵香港學生學「一帶一路」地區嘅語言，陳繁昌話當地受美國流行文化同地緣政治影響，沙特社會其實好美式，大部分共事者都講流利美式英文。

FII峰會揀香港 話優勢加努力爭取

佢話唯一掛住嘅係中菜，尤其無豬肉好難煮嘢，例如首都利雅德有間國際五星級酒店，用雞肉整「叉燒」，始終味道唔同，「每次我返洛杉磯或香港，第一件事就食點心」。

沙特阿拉伯未來投資倡議研究所（FII）上月喺香港舉辦亞洲峰會，有份坐FII董事會嘅陳繁昌話FII揀地點開峰會，上海同東京有政治敏感，新加坡地處東西交匯係首選，但最終香港成功爭取。佢話香港優勢在於係中國一部分，但又有自己貨幣、法律制度同國際營商經驗，「又唔完全係中國」，同時港府高層同港交所先後拜訪，努力爭取得嚟。