【Emily】助50間NGO 陳廷驊基金會講「信」字

【明報專訊】之前3年新冠疫情除咗打擊企業同打工仔，仲有小型嘅非政府機構（NGO）。陳廷驊基金會喺2020年至舊年推出「雪中送炭計劃」，以「信任為本」方式為50間無接受社署恆常撥款嘅小型NGO，針對營運開支提供共3300萬元資助。獲約28萬元資助嘅專注力不足／過度活躍症（香港）協會，其執行總監伍敏姿話喺2020年只有一個全職員工，同年第二季剩低5個月營運資金，嗰個員工或要停薪留職，家長支援小組及工作坊等服務面臨要削減至一成，形容當刻好絕望，幸得基金會資助先走出困境。

被問到點解會以「信任為本」嘅資助模式，基金會信託人及策略總裁張添珞話源自外公、南豐集團創辦人陳廷驊嘅一句行善格言「想到自己，想到對方」，認為最重要係自己出於善心助人，對方嘅出發點係好定壞唔喺自己控制範圍內。

伍敏姿話，坊間唔少撥款機構都要求受助機構交核數報告，但係基金會只要求喺分別半年及一年就點樣用資助做初步估算，同埋要同其他受助機構互相學習、分享經驗。

計劃喺過去3年累積收逾500份申請，獲選機構可獲上限75萬元嘅核心營運資金，以支援最長9個月營運所需。