經濟
星爺伙抖音搞微短劇 《金豬玉葉》5月有得睇
【明報專訊】唔知大家掛唔掛住周星馳（星爺）嘅作品呢？雖然星爺近年喺Instagram變得活躍，不過對上一次正式出鏡已經要數到2017年嘅《西遊伏妖篇》片尾彩蛋。字節跳動（Bytedance）旗下短片社交平台抖音噚日為一眾戲迷帶來好消息，平台同周星馳達成獨家精品微短劇合作，雙方將會聯合開發營運「九五二七劇場」，即係好有可能再次睇到星爺演出喇。
抖音透露，「九五二七劇場」首部精品微短劇《金豬玉葉》第一季預計將於今年5月有得睇，《金豬玉葉》將由周星馳出品，並且有一線女星參演，希望短劇可以為觀眾帶來輕鬆一笑，緩解疲勞，舒筋活絡，以更振奮精神面對生活。周星馳就話，短劇係近年科技創新同媒介創新一個迅速發展領域，仲叫大家多多捧場。星爺以前喺《食神》成功溝出「瀨尿牛丸」，唔知佢本人同抖音又會有乜新火花呢？
email: [email protected]
