【Emily】Uber試行可揀call「綠的」

【明報專訊】以往叫Uber Taxi乘客無得揀「紅的」定「綠的」，Uber噚日公布，前日起試行增加新界的士選項，只要上落車地點都喺新界的士經營範圍內，就可以揀call綠的，不過就不適用於機場出發嘅的士，同埋只限單一目的地、無中途站嘅行程，亦都唔可以中途改落車點。Uber話呢個服務會喺3月初正式全面推行至所有Uber App用戶，預計大部分新界的士嘅行程收費會比現有市區的士平，希望可以令乘客有更大靈活度，同埋幫到新界的士司機接多啲單。

另外，下星期六就係農曆新年，Uber過去兩日開始喺全港32個地點派發兩萬個利市封，每個都印有「HKDRAGON」優惠碼，新用戶搭首程Uber Taxi最高可減100元；下星期一同下星期二，Uber亦會再喺柴灣、荃灣、銅鑼灣、大埔站等派利市封。