【Emily】有心人雖多 暫唔收捐款 劇協為搞頒獎禮義賣籌款

【明報專訊】由香港戲劇協會主辦嘅「香港舞台劇獎頒獎禮」，早排被藝發局通知停止資助今屆（第32屆）頒獎禮，雖然冇政府資助，不過劇協決定繼續辦頒獎禮，定喺4月至5月舉行，資金方面就會透過義賣籌募。劇協幹事莊梅岩喺facebook分享義賣活動帖文嘅同時，透露喺「藝發局斷尾糧」事件後，劇協嘅幹事都收到好多有心人想捐款，不過佢哋討論後決定暫時唔接受捐款，只係以義賣形式籌款。

據劇協噚日喺facebook公布，義賣嘅3款紀念品包括襟針、布袋同撲克牌，每款售價一律200蚊，其中布袋同埋撲克牌會印有《十二怒漢》舞台劇嘅經典台詞及劇照，襟針就係香港舞台劇獎襟針（圖），會限量製作及附有獨立編號。

劇協仲推出限量40套嘅福袋，售價700蚊，入面除咗有嗰3款紀念品，仲有「《香港劇壇點將錄》（第五輯）—香港舞台劇獎20周年誌慶版」，入面收錄咗多篇同舞台劇獎有關嘅文章，以及頭20屆嘅獲獎者感言等，據莊梅岩所講，福袋喺開賣後半個鐘已售罄。