【Emily】高官兵分多路 過年前探基層

【明報專訊】臨近歲晚，政府多名主要官員喺民政事務總署統籌下，分別去各區探訪基層家庭，其中政務司長陳國基喺facebook發帖，提到佢喺民青局常任秘書長、油尖旺民政事務專員同埋本身係尼泊爾裔嘅區議員Aruna Gurung陪同下，噚日去咗油尖旺探訪兩戶少數族裔家庭。陳國基引述探訪嘅孟加拉裔父親提到希望盡快「上樓」，改善居住環境。

另外，政務司副司長卓永興、財政司副司長黃偉綸、保安局長鄧炳強、商經局長丘應樺、發展局長甯漢豪、創科及工業局長孫東、勞福局長孫玉菡，就分別去咗大坑勵德邨、南區石排灣邨、中西區、葵涌、將軍澳尚德邨、大圍隆亨邨同埋大埔墟多處探基層市民。特區政府話主要官員今日會繼續探訪基層家庭，送上賀年福袋同節日祝福。