【Emily】求籤主持口誤 「請到劉皇發」 劉業強5求始得籤 解籤人：意頭唔太好

【明報專訊】噚日大年初二車公誕，鄉議局成員按傳統朝早7點去到車公廟拜車公兼為香港求籤，但今年開場前發生「蝦碌」事件。身穿紅色唐裝嘅鄉議局主席劉業強與沙田鄉事委員會主席莫錦貴、沙田區民政專員余懷誠等人步入車公廟，當主持人介紹時，話邀請到「新界鄉議局主席劉皇發」主持求籤！劉業強聽到只能笑笑，而現場聽到有人大叫「喂，你講錯嘢！」及「喂，你講咩呀？」，主持人發現出錯，隨後講「sorry」道歉更正，獲在場嘅人拍掌。

劉業強為香港求籤時都遇到少少阻滯，佢搖籤筒時先後4次跌出多於一支籤，廟祝見狀就指示佢再三叩拜車公，第5次終求得第15籤中籤。解籤人陳天恩認為劉業強求咗5次先成功，意頭唔係太好，話「無人求籤會求到咁」，估計佢當時心神不定。睇番資料，劉業強上年一次就成功求到籤。

新冠疫情前曾有安排舞麒麟引領入廟嘅安排，即使今年復常亦繼續停辦，於2015年被麒麟「KO」嘅行政會議召集人葉劉淑儀噚日未有現身。葉太喺社交媒體同大家拜年，貼咗一襲旗袍照，話大年初二天氣回暖，大家可以聚首一堂，觀賞璀璨煙火，喜迎龍年。