【Emily】雙層氫能城巴 最快一個月內載客

【明報專訊】城巴為全港首輛雙層氫能巴士作不載客道路測試，並安排架車喺九龍市區嘅20號線來回行駛，路線沿窩打老道來往九龍城、油麻地、旺角及深水埗區，預計一個月內可以安排氫能巴士投入服務。城巴話今次係香港首次引入氫能巴士，有咗呢次經驗，希望日後各項審批程序簡化，進一步推動氫能車市場普及化。

城巴指按照氫能源跨部門工作小組同埋各政府部門要求，做咗多項測試同培訓，包括由獨立第三方機構為氫能巴士行駛嘅每條路線作量化風險評估；巴士喺西九龍車廠內繞圈行駛滿200公里；位於西九龍車廠嘅全港首個加氫站，為氫能巴士多次加注氫氣；首批氫能巴士導師及車長已完成培訓，熟知車嘅性能及各項安全守則，同時有指定認可人員操作加氫站等設備。

城巴喺上年啟動零排放轉型計劃「#MissionZero」，引入雙層氫能巴士同設置全港首個加氫站，目標係2045年全面使用零排放巴士，較政府提倡嘅碳中和目標早5年。