【明報專訊】新界鄉議局噚日舉行新春團拜，其間主席劉業強（中）、特首李家超（左四）、政務司長陳國基（右三）、立法會主席梁君彥（右二）、中聯辦副主任何靖（右四）、外交部駐港公署署理特派專員李永勝（左三）等人一齊主持切「金豬」儀式，企中間嘅劉業強揸刀切落燒豬嘅時候，旁邊一眾嘉賓齊齊幫手先將燒豬切開。
今年出席嘉賓仲有民青局長麥美娟、發展局長甯漢豪、海關關長何佩珊、入境處長郭俊峰等高官，另亦有數十個立法會議員。Emily仲喺會場外見到人稱「娥姐」嘅參選常客陳玉娥，佢話自己每年都有嚟，雖然就無入到會場，但都有同一啲鄉議局同三會成員簡短交流，話「大家恭喜發財嘅啫」。
