【Emily】初二求籤由官員改鄉紳出手 曾俊華話原因大家都知

【明報專訊】每年農曆大年初二都有車公廟求籤活動，今年鄉議局主席劉業強為香港求得中籤，解籤人話唔算太好嘅籤。前財爺曾俊華噚日講，佢都曾經參加過求籤盛會，以前都係由官員做求籤者，佢1980年代曾陪同時任民政專員曾蔭權去車公廟，但曾俊華隱晦咁講，「大家都應該知道後來點解改由鄉紳代勞」。曾俊華又話，喺佢印象中大家求得嘅籤一般都唔錯，「所以當時我一直都有啲懷疑，喺咪有人做咗手腳，抽起晒啲下籤」。

坊間眾說紛紜 有指避免官員尷尬

由鄉紳代替官員求籤原因，坊間有唔少講法，包括避免官員求到下籤尷尬。有傳媒曾報道，1984年時任沙田政務專員曾蔭權為香港求得下籤，喺在場者提議下佢再求多一次，求得一支中籤。喺1990年代至2000年代初，官員多求到上籤，及至2003年大年初二，時任民政事務局長何志平求得第83號、寓意「凡事不吉」嘅下籤。

曾俊華就話，無論有冇宗教嘅人，當聽到大年初二嘅籤文，「大家都會覺得車公講得好準」，而佢自己都覺得準到難以解釋；有朋友曾經同佢講，車公係最啱嗰啲做「偏門」工作嘅人去拜，做政治都應該算係「偏門」，所以唔知係咪因為咁，去求籤會零舍算得準喎。