【Emily】簡屋撥款表決 何永賢會面解說 田北辰轉軚撐

【明報專訊】立法會財委會今日表決第二批簡約公屋項目撥款，本身諗住投反對或棄權票嘅實政圓桌田北辰噚日話，房屋局長何永賢前日同佢會面，局方再就屯門「小欖樂」對當區交通影響及飛機噪音處理補交資料，最終令佢喺開會前夕改變初衷。佢讚當局今次認真同仔細，「樣樣嘢都執正」，舉例針對佢提出嘅飛機噪音問題，移除位於「飛機噪音預測NEF25」覆蓋範圍下嘅住宅項目，加上有見項目所產生嘅車流量只佔整體約4%，未至於塞爆青山公路，於是決定支持撥款。

田北辰上次喺立法會工務小組委員會批評，即使當局唔介意就「小欖樂」項目補交資料，仍有大比數議員反對喺財委會再討論，質疑議員未盡監察責任。Emily噚日問田投票意向，佢就話星期一未收到局方回覆，打電話查詢後就喺翌日收到，但佢不滿當時文件僅話公路仲有好多餘額，於是要求對方再補充。何永賢前日親自當面解說，但無實際數字，最終當晚局方提交相關車流量資料，令佢決定支持撥款。

話「如果議員太鬆，啲官就好乸西」

田北辰話唔評論其他議員有無盡責，認為議員催谷下官員就交出有水準嘅表現，但「如果議員太鬆太寬容，啲官就好『乸西』」，呼籲大家唔好咁易收貨。