【Emily】杏橙與粉紅 女議員「晨曦色」迎財案

【明報專訊】近年唔少官員同立法會議員都喺特首、財爺宣讀《施政報告》或《財政預算案》時，以主題顏色做「dress code 」。新一份預算案封面用上被稱為「晨曦色」嘅蝦肉色，寓意期盼香港未來一年嘅經濟逐步改善，但唔知係咪「晨曦色」難買，除咗尚海龍戴咗同色領呔，其他人多以相近顏色現身，財政司長陳茂波亦打咗橙色呔。

尚海龍條呔最match

房屋局長何永賢同行會召集人葉劉淑儀身穿杏色外套，林琳、梁美芬著橙色，容海恩同葛珮帆就配搭粉紅色外套。會議開始前，葉太、葛珮帆、梁美芬等著咗鮮色衫嘅女議員合照，葛珮帆仲喺社交平台上傳相片，話係「以晨曦色彩迎接預算案」。

Emily留意到議員李慧琼同陳曼琪似乎未有出席會議，睇番呢排行程，身兼全國人大常委嘅李慧琼幾日前去咗北京開會，應分身不暇；Emily亦就此向陳曼琪查詢，截稿前未獲回覆。另外，有多名行政會議非官守成員捧場，坐喺會議廳嘅觀眾席，包括任志剛、高永文、陳清霞及梁高美懿。