【Emily】探監3年感想 Emilia：付出非因愛情 係為所信原則

【明報專訊】民主派「35+初選案」中，47人被控《港區國安法》串謀顛覆國家政權罪，其中32人至噚日已還押3年，至於獲保釋嘅被告大部分都唔活躍於社交平台。被告之一嘅劉頴匡仍還押，佢女友黃于喬（Emilia）噚日喺facebook講探監3年嘅感想，話3年嚟基本上每日都去探監，無缺席過男友任何一場審訊，而呢幾年嘅堅持同付出唔係因為愛情，而係為相信嘅原則付出。

Emilia話，自己同劉頴匡相識9年，有三分之一時間都係被高牆分開，又提到好多人會話佢呢幾年為劉付出，用青春嘅時間等男友，感情一定好好，未來一定會開花結果，但佢話自己唔係咁諗。佢就覺得感情唔係追求結果，而係持續嘅經營，話同劉頴匡呢3年並非企喺原地等待彼此，兩個人都為感情同各自嘅修為學識，持續投入努力，不斷成長。

話劉頴匡調咗去赤柱「坐擁海景」

Emilia又話自己選擇得繼續投入，就唔會喺度論得失、講利益，亦唔會要求任何回報，因為堅守原則並唔係一場交易。佢透露，劉頴匡上星期調咗去赤柱監獄，?家探監來回要4個鐘，但講笑話喺赤柱監獄坐監坐擁全港最貴嘅海景，「唔算太慘」，探訪室玻璃好清無花痕，「可以全高清1040p咁見到對方」。