【Emily】戶外智能健身設施 維園等4地明年度試行

【明報專訊】早前《施政報告》提出喺康文署戶外康樂場地引入智能健身設施，文體旅局楊潤雄噚日書面回覆立法會議員梁毓偉質詢透露，康文署將會推行試行計劃，2024/25年度喺維園、海輝道海濱花園、九龍仔公園同屯門嘅海珠路遊樂場，引入智能健身設施，畀市民可以存取個人運動數據同運動健康資訊，方便管理個人健康、監察體質及增加運動樂趣，以鼓勵市民做運動。

8體育館健身房設體脂機

楊潤雄又透露，上個月已經喺8個體育館健身房設立自我體質測試站，設有體脂機，市民可隨時做簡易嘅自我體質測試，獲取身體脂肪百分比、肌肉質量同體內水分量等資料，仲可以即時用手機下載測試報告。呢個計劃會喺今年內擴展至餘下10個分區，預計每年約有10萬人次使用。