【Emily】偵測同機App唔安全 匯豐App會停用 只限Android用戶 稱絕不讀取個人資料

【明報專訊】匯豐銀行近期為Android裝置用戶嘅HSBC HK App同PayMe加入新功能，如果偵測到裝置上有非手機官方應用商店下載嘅App並授予過多權限，例如係「熒幕共享」或「完全控制您的手機」等，就會暫停用戶使用匯豐App。唔少網民關注日常使用手機習慣受影響，香港資訊科技商會榮譽會長方保僑就覺得一定會麻煩咗，但係從保安立場「大家都唔想唔見錢」，建議有需要嘅市民分開兩部電話使用。

防盜資料 針對非官方商店下載App

方保僑同Emily講，從非官方商店下載App，有可能下載咗惡意軟體而被盜取銀行資料，再轉走啲錢，認為匯豐加入新功能係無可厚非。不過佢關注，好似政府嘅「智方便」App亦可由政府網站下載，唔知受唔受影響。

匯豐回覆Emily話，要觸發停用匯豐App，要同時裝咗非官方商店App同埋有過多權限，客戶只要關閉相關App嘅「協助工具／無障礙」授權或刪除，就可繼續用匯豐App。至於新功能會唔會讀到用戶裝置其他個人資料，匯豐講明絕對唔會監察或存取用戶喺裝置上嘅活動或其他任何個人資料。資訊安全研究員賴灼東話，手機App如果由官方商店下載會有電子證書，偵測過程理應唔涉及其他個人資訊。