【Emily】趙慧賢將卸申訴專員 對下任陳積志有信心

【明報專訊】申訴專員趙慧賢今個月31日就卸任，由前民政事務局副局長陳積志接任，下月1日起生效，為期5年。趙慧賢噚日主持最後一次申訴專員主動調查報告新聞發布會，佢話過去5年發表咗46份主動調查報告，希望透過主動調查，提供一啲建議畀有關當局「做系統性嘅改善」，提升公共行政服務同跨部門協作嘅效率。佢又話，相信政府係揀選咗有能力同有承擔嘅人接任，對下任專員有信心。

陳積志之前喺政府做事近40年，做過公務員事務科、保安科、教資會、工務局、環境運輸及工務局、發展局等，2022年離開政府前係署理民政事務局長。陳積志做民政局副局長時曾捲入「洪門宴」風波，喺新冠疫情期間出席洪為民生日會。陳事後發道歉聲明，話自己唔夠敏感。之後局長徐英偉因呢場風波請辭，陳就署任局長。