【Emily】啟德供冷系統增用預製件 減施工時間

【明報專訊】政府近年大力推動「組裝合成」建築法（MiC），縮短施工時間，機電工程署話現正施工嘅啟德發展區供冷系統新增部分，亦應用咗機電裝備合成法，即組裝合成法嘅「機電版」，先喺工廠預製組件，再運到現場裝嵌，署方話可以減省到工序同安裝時間。

機電署能源效益部工程師黃燕嘉接受「政府新聞網」訪問，佢話新增嘅區域供冷系統廠房位於啟德核心地帶，無論地盤空間、工程複雜程度、施工工期及人手不足等，對隊項目團隊都係好大挑戰。

機電署因此喺新增嘅部分工程用咗機電裝備合成法，先喺工廠預製複雜組件，再喺現場裝嵌，例如要安裝高15米嘅大型迴轉式攔污柵組件，以阻隔大型垃圾進入散熱系統，由垂直吊運到放入水庫固定位置，整個流程就由原本十幾日縮減至半日。

區域供冷系統年省1.38億度電

啟德發展區採用嘅區域供冷系統可供多幢建築物使用，能源效益較傳統氣冷同水冷空調分別高35%及20%，為應付區內持續發展，該系統除咗正運作嘅南北兩廠，新增部分今年完成後，將供應冷凍水畀新急症醫院、啟德體育園等，預計成個發展區每年可節省1.38億度電，相當於減少9.6萬公噸二氧化碳。