【Emily】消防周六辦投考體驗 即場試做體能

【明報專訊】消防處星期六（16日）將喺將軍澳百勝角消防及救護學院舉辦「投考體驗日」，分享消防處各職系嘅投考資訊，仲會講解入職視力測試同埋體能測驗要求，投考者仲可以即場試做體能同模擬實際工作測驗。

投考體驗日由上午9時開始，下午1時結束。有興趣參加嘅人，要預先喺網上登記成為消防處招募連線計劃成員，之後會有專人通知活動詳情。招募連線計劃涵蓋大學生、內地大學港生、運動員同少數族裔。有關連結可以到喺「香港消防處」facebook搵到。

講到考消防最新要求，Emily睇番資料，上年12月消防處曾經調整安排，包括可以佩戴眼鏡接受部分視力測試、修訂體能測試項目次數同延長時限，以及引入傾斜引體上升畀考生選擇。