【Emily】助基層童 「田叔叔英語計劃」5周年

【明報專訊】實政圓桌立法會議員田北辰5年前開始自資推出「田叔叔英語閱讀計劃」，向學童免費提供英文故事書和電子點讀筆，佢噚日舉辦5周年分享會。田二少喺facebook提到，10年前一個電台節目令佢有好多反思，知道基層家庭好難有資源幫小朋友學英文，但英文對學生日後升學好重要，如果4、5歲時唔接觸，到大個先學，只會痛不欲生。

田北辰自資 兒童書展有活動

關於點樣提起小朋友對英文嘅興趣，田二少都有啲心得，佢話大部分教科書好悶，「田叔叔圖書」就靠住點讀筆、精美手繪插圖、4名小主角、香港本地場景，加上有追看性嘅故事，令到小朋友以睇古仔為樂、學英文為次，不知不覺咁吸收地道英文。

田二少提到，佢哋啲書亦唔係一成不變，每兩年會按網上投票嘅人氣故事排行榜，foul走最低人氣嘅6本書，再換6個新故事，希望保持新鮮感。另外，佢會喺5月19日亞博「兒童書展」舉辦活動，展出製作「田叔叔圖書」時嘅手稿、過程等。