【Emily】5000萬元放彩蛋唔收錢？ 楊潤雄：建Art@Harbour品牌

【明報專訊】康文署伙拍藝術團隊teamLab喺添馬公園同中西區海濱長廊放置彩蛋，兩項活動成本約5000萬元，免費畀遊人參觀打卡。立法會議員江玉歡反問，同樣展覽喺其他地區要收錢，點解香港唔可以收一百幾十元幫補一下？文體旅局長楊潤雄噚日就話，政府當然會嚴謹用公帑，都諗過呢項計劃係咪收費，但因為想建立Art@Harbour品牌，今次係第二屆舉辦，上年都無收錢，目的係想提高整個藝術氛圍，畀市民和旅客有更多地方和活動參與，所以維持免費。

內地早排開放青島及西安居民自由行訪港，楊潤雄亦去咗呢兩個城市推廣，話會繼續同當地旅遊業界好好合作，做好旅遊推廣。

2月訪港旅客 回復疫前72%

旅發局噚日亦公布，今年2月初步訪港旅客達400萬人次，按年上升約1.7倍，當中八成係內地旅客，有324.6萬人次，按年增近兩倍。翻查旅發局資料，疫前2019年2月訪港旅客總人次逾558萬，內地旅客佔約456萬，即今年2月嘅總旅客人次，回復至2019年同期約72%。