【Emily】用聲納為樹木「驗身」 減傷害增效率

【明報專訊】全港約55萬棵樹由康文署管理，主要包括公園及康體場地嘅樹木。平日樹木保養工作好重要，康文署話，佢哋嘅人員先用肉眼檢查樹幹，當發現或懷疑樹木有腐爛或其他結構問題，就會用科技協助，透過聲納探測儀，檢查樹木內部狀况，以增加工作效率，對樹木嘅傷害亦比較小，另外會用微鑽阻力測試儀、小型無人機等科技，協助監察樹木狀况。

康文署高級訓練助理（園藝課程）廖國興話，使用聲納探測儀時，人員會先將多個感應器安裝喺樹幹上，再用連接咗電腦嘅金屬槌逐一輕力敲打，結果屏幕會以唔同顏色、透過二維或三維圖像顯示出嚟，木質組織狀况一目了然。

佢認為，新科技可以為風險評估提供更多客觀數據，令樹木護養部門分析數據時，可以適時制訂相應風險緩減措施，喺樹木風險與保育之間取得平衡。