【Emily】經昂船洲大橋 單車百萬行 為建院舍籌款

【明報專訊】「上海商業．博愛單車百萬行2024」噚日舉行，參加者朝早7點幾由青沙公路起步，經過昂船洲大橋去南灣隧道出口，再去昂船路附近折返，全程約13公里。活動由博愛醫院主辦，目的係為醫院籌募善款興建屯門藍地長者護理及護養安老院舍。Emily睇活動相，見有唔少家長帶埋小朋友參加，當假日親子節目。

今次活動嘅參加名額有6000個，報名者可以個人名義參與個人組，又或者以組隊形式參加企業及團體組，各自嘅最低籌款額分別係每位780元或每組3.2萬元。

保安局長鄧炳強主持活動起步禮，並且同一眾嘉賓、藝人展示「防騙視伏App」嘅宣傳品，以及同身穿「防騙視伏器」宣傳制服嘅警犬影相，仲一齊高叫「防騙視伏器，防騙是福氣」口號。