【Emily】移民置業展採訪通知提23條 話「登記入場人數即時攀升」

【明報專訊】《基本法》23條本地立法周二通過，政商界都話係香港由治及興又邁進一步，各商會都話社會更穩定，大家可安居樂業。有投資顧問公司通知傳媒採訪今日舉行嘅海外置業展銷會，資料上以紅字介紹「23條立法通過 登記移民展入場人數即時直線攀升」，預告同場更會公布一項「香港人計劃海外移民及置業意向」嘅問卷調查。

呢間顧問公司向傳媒送出嘅採訪通知話，登記入場參觀展覽嘅人大增，「目前已經有超過25,000人預先登記入場」，仲話「近期港府有意加強愛國主義教育；加上近期港人移民的首選英、澳兩國都有收緊移民政策的趨勢，成為了港人移民的最後一道催化劑」。

總商會：香港更安全的宜居地

社會各界對香港前景有唔同睇法，23條通過後，各商會例如香港中華總商會、香港中華廠商聯合會、香港總商會、香港工業總會等都發聲明表示歡迎，其中總商會話深信23條立法除有助本港成為「更安全的宜居宜業宜商目的地」，更能振興本地經濟民生。工總亦話條例將為本港「由治及興」保駕護航，東方之珠會有璀璨奪目嘅光芒。