【Emily】耀興道明早開西行線 爭6月底前全面通車

【明報專訊】舊年9月8日世紀暴雨襲港，筲箕灣耀東邨一幅天然山坡塌下大量山泥，耀興道全線封閉。事隔半年，路政署噚日宣布，經修復路面及巴士試路後，聽日朝早約5點半會重開耀興道西行線行車，並爭取6月底前全面重開耀興道行車線同行人路。

路政署話舊年12月清理完路面沙石及安裝防護設施後，隨即展開斜坡復修工程，包括用大型吊機將斜坡嘅大石移除、用石屎噴漿穩定斜坡面等，𠵱家已完成並修復路面，而行經該段路西行方向嘅6條巴士線及專線小巴線，聽日起會全部恢復行駛原有路線，不過耀明樓對出巴士站就繼續停用。至於沿耀興道東行嘅巴士及小巴路線就維持現時改道安排。

路政署話會繼續做餘下嘅斜坡復修工程，包括喺山坡中腰部分噴漿同安裝金屬護網，又會建造混凝土扶壁、以岩釘加固山坡上嘅巨型孤石，亦已喺路面放置貨櫃做臨時屏障，保障道路使用者安全。