【Emily】獲聯國中國代表贈蛋糕 張國鈞：經濟「彈」更「高」

【明報專訊】《基本法》23條立法通過翌日，身在日內瓦嘅律政司副司長張國鈞（Horace）出席聯合國人權理事會，用盡2分30秒發言時間講23條同反擊外國批評。Horace喺社交平台話，通過當日拜會中國常駐聯合國日內瓦辦事處代表陳旭（圖1），對方知道立法會全票通過23條後，特登準備個寫有「一帆風順」嘅蛋糕（圖2），祝香港發展前程似錦。

Horace又以蛋糕「食字」借題發揮話，深信23條通過後，香港一定能再創輝煌，「經濟『彈』（蛋）得更高（糕）」。開會前一日，Horace喺日內瓦聯合國平時開會嘅萬國宮（Palais des Nations）門口打卡，仲仰望中國國旗。

不過，Emily留意到，聯合國方面有小甩轆，早前直播人權理事會會議時，將Horace姓氏由「Cheung」串錯做「Chen」，開會過後兩日都未改正。