【Emily】沙頭角個人遊 名額倍增至600個

【明報專訊】保安局今年1月起開放中英街以外嘅沙頭角範圍，每日設1000個旅遊名額，當中個人遊同旅行團旅客名額佔300同700個。保安局噚日喺facebook宣布，沙頭角第二期開放以嚟大受歡迎，特別好多朋友鍾意網上申請禁區證入去個人遊，局方喺下月1日起會將個人遊名額「加碼」一倍至每日600個。

平日旅行團唔使再攞配額

保安局話，同日亦會取消平日嘅旅行團配額（公眾假期除外），喺平日舉辦嘅旅行團毋須再攞配額就可以直接申請禁區證。市民可以喺本月25日早上10點起去警務處網上平台申請新增配額嘅禁區證。局方又提醒想去地質公園嘅市民，下月開始只要事先申請好沙頭角禁區證，就可以由荔枝窩、吉澳同鴨洲出發，乘搭街渡入沙頭角。