【Emily】梁振英率團訪洪國 教路防登革熱

【明報專訊】全國政協副主席梁振英上周率大隊去咗洪都拉斯，幫手推動一帶一路嘅民間交流工作。梁振英以共享基金會主席嘅身分，聯同總幹事陳英凝同埋團隊，喺3月18日抵達呢個中美洲國家，展開超過1000公里嘅考察之旅，到訪包括首都德古西加巴嘅聖菲利佩醫院同多個城市嘅醫療機構，調研當地登革熱情况，並同當地嘅高級別官員商討喺當地開展登革熱防控。

捐檢測劑滅蚊燈烏蠅紙蚊帳

洪都拉斯外交部喺去年3月25日宣布同台灣斷交，翌日同中華人民共和國政府建立外交關係。時值建交將近一周年，梁振英一行人喺當地仲同洪都拉斯兩位副總統、外長、中國駐洪都拉斯大使于波等出席慶祝中洪建交一周年招待會，介紹協助當地防控登革熱，結合及時診斷病患嘅工作。基金會向洪都拉斯所有32家醫院同其他合適場地，捐贈10萬套快速檢測劑、6000台滅蚊燈、6萬卷烏蠅紙、1000頂蚊帳和大量嘅宣傳教育材料。基金會仲會派出工作人員和志願者去當地，同埋邀請洪都拉斯醫護人員加入共享基金會嘅「全球醫學獎學金和培訓計劃」，增進兩國喺醫療和衛生領域嘅交流。梁振英話希望透過民間支援同交流項目，實踐「民心相通」作用。