【Emily】家庭開心指數6.43分 連跌4年 一向最高分 長者跌幅大 移民係主因

【明報專訊】和富社會企業「香港開心D」聯同東華學院護理學院噚日發布最新「家庭開心指數」，指數由2021年嘅7.26分（10分滿分）跌到今年嘅6.43分，連續4年下跌，其中65歲或以上嘅長者群組跌幅較大。

和富社區服務網絡督導委員會委員翟冬青話，過去幾年有好多人或家庭移民，剩低需要支援嘅長者，部分長者更可能要短時間內接受同適應家庭嘅巨變，導致開心指數下跌。

調查機構去年12月7月至21日以網上問卷訪問1316名市民，得出今年家庭快樂指數。65歲或以上嘅長者群組，家庭開心指數同個人開心指數由去年分別7.37同7.29，跌至今年嘅6.5同6.63。

東華學院護理學院副院長（研究）林清認為，今年65歲或以上嘅長者群組開心指數跌幅屬特別現象，過去長者一直係所有年齡層中開心指數最高嘅一群人。

翟冬青提醒，父母同兒女要盡早溝通安排，即使離開香港都可以透過網上保持聯絡同維繫彼此關係，唔需要因為地理距離就斷咗關係。