【Emily】多種珊瑚現南丫海域 港燈話電廠無損生態

【明報專訊】港燈同長春社合辦環保教育項目「綠遊香港」，自2005年起推行，今年以「生物多樣性」為題籌辦一連串活動，上周末就舉行咗「生境多樣性：大海撈Junk」線上遊，邀請幾名講者同逾百市民分享保護環境同發展生態嘅重要，亦分享咗港燈早前喺南丫發電廠海堤附近水域做珊瑚調查嘅結果。港燈公共事務總經理楊玉珍話，公司嘅南丫發電廠一直致力保護島上同附近水域嘅生態環境，包括栽種本土植物，定期監測空氣、噪音及水質等，確保生態不受影響。

珊瑚調查係港燈委託專業機構，舊年8月對發電廠附近水域做研究，發現多種珊瑚如石珊瑚（Hard Coral）及八放珊瑚（Octocoral），普遍健康狀况良好，無白化迹象。港燈話反映電廠嘅營運無對附近海洋環境產生不利因素。